Van Land und Lüe

Wat ick noch seggen woll, kinn ji us egentlich, de beden lüttken Düörper, Üörmholsten un Niienholsten, dor buorben in´n Holde, mitten up`n Wiehengebirge?
Van us ut in Richtung Norden geht et dann oll in`t Wittlagische. Früher, vor de Gebietsreform wörn wie twe egenständige Düörper, met`n richtigen Bürgermester. Met de Reform wörd datt dann olles anners. Üörwer Nacht wörn wie no Melle eingemendet un wörn nu plözlich auck Städter, un to seggen hadden wie auk nix me.
Ower dat geht de meesten van ju je auk nich anners. Vor de Gebietsreform ha wie in Holsten no jede Menge Akkerland un Wisken. Dat is nu auk anners. Dat hett van Dage inne Stadt je" Grünanlagen". Un dat vierle Holt,dat is de"grüne Lunge" van de Stadt. De Lüe ut de Citti beßögt us denn mangens Sönndags ümme friske Luft to schnappen. Manche bringet dann auck wat met, wat se bi us in`nHolde avlegget.
Meest kürn wie dat Kraum ower auck nich bruken. Os Gegenleistung hebbt se dann usen Biärch antappet und niermt us dat Water av. Over man schall nich üörwer ollens graute Schnuten häbben, so wie dat nu mol is, so is dat.
Wenn wie auk wiet van de Citti wurnt, Holsten häv doch so ollerhand uptowiesen. Met denn Hesterbrinck häv wie denn häuchsten Biärch van de Stadt. Dann givt bi us wat, wat et nur eenmol up de ganzen Welt giv. De Gessemsken häwet je iähre Bifurkation, womet se auk mächtich angiewet. Ower sovierl ick weet, givt de woanners je auk nomorl. Over bi us in Holsten, bi Niesterwitten in`n Guordenlocke,do achtern in´n Waule , in`n Fosskuhlenbrinck, dor entspring de Hunte. Un dat döt se nur eenmoll up de ganzen Welt. Un wenn Holsten nu nich wör, un de Hunte nich entsprüng, harre de Dümmersee kein Water. Ick mach denn Faden nich wiederspinnen, ower manchmoll denk ick wat dann woll met de Nordsee wör, wenn...
Jau, un toläste häw wie je auk noch denn Ponyhof, zu Erbauung un körperlichen Ertüchtigung.

Mangens meen ick, dat de Clemens Schwertmann, wat use jetzige Oberbürgermester is, garnich so richtig weet, wat he sick dor met de Holster un met Holsten an Land tuorgen häv.

Ziemlich ault send wie auk oll. Dat erste moll erwähnt wer wie in´n Johre 1068. Egentlich ha wie vor der Reform use niergenhunnert Johrfieer fierden mößt. Ower dat harre us to vierl Geld kost. Man konn domols je schon avsehen, dat se us eenes Dages kassieren wörden, un os Habenichtse wolln wie je auk nich in de niee Gemeinschaft intriärn. Jau , un dat is auk bewiesen, de bekannte Sachsenfürst Wiedukind häv vor de grauden Schlacht schon in Holsten kampiert.
Hölt, hölt, dat ji ju nu nich verdoot. Dat hat met denn Hermansdenkmol un de Schlacht In`n Teutoburgerwald nix to doon. Wie Holster häbbt oll immer use egenen Schlachten schlagen.
Jau,un de Lüe bi us, dat is en gans gesunden Schlag. Use gode aule Doktor Bockbreder schall mol secht häbben, wenn he van de Holster liewen mösse, denn könne he man sein Laden tomaken.
De meesten van us arbeetet in de Landwirtschaft, wecke gohrt mett`n Frettpott ut to arbeeten, annere sit´t irgentwo up`n Büro herümme, un ut`n paar van us is auk watworden. Un nu noch son lüttgen Snack, wat met den Gesangverein wat to doon häv. Wenn ji mool van Melle no Bad Essen föhrt, denn kurm ji je dühe Holsten.
Mitten in´n Duorpe is auck vandage noch son´n Striepen Ellernholt. Düe dat holt flüt de Bierke, un et giv doar ne ganze masse Tümpel. Dat wörn früher Reutekuhlen wor de Burden denn Flass inset´n. Dormols, os et de Grönen noch nich gav, un man de Umwelt noch nich entdeckt harre, keimen in´n Sommerdag in düsse Tümpel dusende van Poggen, ümme dor to frieen. Un dorbi maket de Nachts een Spektakel, dat de ganze Burskopp nich schlaupen konn. De Lühe häbbt dann schulen üörwer düsse verdammten Reutekuhlenbölker. Beuse Tungen behauptet nu, dat düsse Reutekuhlenbölker de Ur-Ur Urahnen van denn Gesangverein sind. Ower dat stimmt nich, dat weet ick biärter.
Wenn de Kerls willt, dann kürnt de singen wie´n Nachtigall, de geiv datt nämlich dormols auck in Holsten. Dat Bölken geht erst immer dann an, wenn dor tovierl Brannewien tüsken es.

Je, wat ick no seggen woll, wenn ji noch mehr üörwer Holsten wierden willt, dann beßögt us man up`n Kreissängerfest in`n Juni 1983. Dat geit üörwer veer Dage. En Dag scholl Ji egentlich Tiet häbben. Dann vertell ick ju auk denn Rest.

Oberholsten im Juni 1983
I.P.